Siri ya Supercomputer ya "Colossus" iliyojengwa Ndani ya Miezi 4 Tu
Mambo vipi wadau wa 246 Online! Leo tunaiingiza darubini yetu ndani ya ubongo wa mtu anayependa kufanya vitu vinavyoonekana haviwezekani: Elon Musk.
Kama unafuatilia vita vya Akili Mnemba (AI), utakuwa unajua kuwa silaha kubwa sio maneno, bali ni Compute (Nguvu ya Uchakataji). Mwezi Mei 2024, Elon Musk aliamua kujenga kompyuta kubwa kuliko zote duniani za kufundishia AI kwa ajili ya kampuni yake ya xAI. Wataalamu walimwambia: "Elon, mradi huu utachukua miaka miwili." Elon akajibu: "Sisi tutachukua miezi minne." Na kweli, ndani ya siku 122, mtambo ukawaka!
Hapa kuna uchambuzi wa ndani jinsi Elon Musk alivyofanya mauaji haya ya kiteknolojia na kuacha ulimwengu ukishangaa.
 |
Colossus site |
Mzigo wa Kijeshi: Ndani ya Colossus Kuna Nini?
Mtambo huu uliopewa jina la Colossus ulianza ukiwa na kadi za picha (GPUs) za hatari za Nvidia H100 zipatazo 100,000 zilizounganishwa kwenye mtandao mmoja mkubwa (Single RDMA fabric).
Ili upate picha ya gharama yake, kadi moja ya H100 inagharimu karibu Dola $30,000 (zaidi ya Tsh Milioni 80). Hiyo ina maana Elon Musk alimwaga zaidi ya Dola Bilioni 3 (Tsh Trilioni 8+) kwenye manunuzi ya chips pekee!
Na hakuishia hapo—ndani ya siku 92 zilizofuata, aliongeza kadi nyingine hadi kufikia 200,000 GPUs (zikijumuisha H200 na mifumo ya kisasa ya kioevu ya Supermicro liquid-cooled racks).
Siri 3 Zilizofanya Mfumo Huu Ukamilike kwa Miezi 4:
1. Hakujenga Jengo Jipya, Alivamia Kiwanda Kilichokufa
Kosa ambalo makampuni mengi hufanya ni kuanza kuchimba msingi na kujenga majengo mapya ya data center. Elon alikataa upotezaji huo wa muda. Alitafuta jengo lililokuwa wazi na kununua kiwanda cha zamani cha kutengeneza majiko cha kampuni ya Electrolux huko Memphis chenye ukubwa wa miguu ya mraba 785,000. Kwa sababu kuta na miundombinu ya msingi vilikuwepo, wahandisi wake walianza kuingiza makabati ya kompyuta siku hiyo hiyo!
2. Grid ya Umeme Iligoma? Alileta Majenereta ya Matrela!
Hapa ndipo "Unyama wa Elon" ulipoonekana. Mtambo wa Colossus unahitaji umeme wa kutisha—karibu Megawanti 150 (zaidi ya umeme unaohitajika kuhudumia mikoa kadhaa hapa nchini kwetu).
Uongozi wa jiji la Memphis ulimwambia kuwa gridi ya umeme ya jiji isingeweza kutoa umeme huo kwa haraka mpaka gridi mpya ijengwe. Elon hakusubiri! Alikodi majenereta makubwa ya matrela ya mafuta (VoltaGrid mobile generators) 14 yanayotembea na kuyawasha yote kwa pamoja kando ya jengo ili kupata megawanti 35 za dharura za kuwasha mashine wakati akisubiri miundombinu ya jiji ikamilike.
3. Mfumo wa Kupoza kwa Maji (Liquid Cooling)
Kadi 100,000 zikifanya kazi kwa pamoja zinazalisha joto linaloweza kuyeyusha chuma. Badala ya kutumia mafeni ya kawaida ya hewa, walishirikiana na kampuni ya Supermicro kuweka mifumo mikubwa ya mabomba ya kupitisha kioevu maalum cha kemikali (Liquid cooling blocks) moja kwa moja juu ya kila chip. Hii ilisaidia kuokoa nafasi na kupoza mitambo hiyo kwa haraka ya ajabu.
Dili la Kushtukiza: Colossus 1 Lakodishwa kwa Mpinzani (Anthropic)
Huku kukiwa na habari mpya kabisa, Elon Musk amesogeza mafunzo ya AI yake ya Grok kwenda kwenye mfumo mpya wa Colossus 2. Na kwa sababu ana kompyuta nyingi za ziada, hivi karibuni kampuni ya SpaceX imemkodishia mpinzani wao mkubwa, Anthropic (watengenezaji wa Claude AI), mtambo wa Colossus 1 kwa miezi sita!
Anthropic wamechukua uwezo huo wa kadi 220,000 za Nvidia ili kufanya model yao ya Claude iwe na kasi ya radi na kuhudumia mamilioni ya watu kwa wakati mmoja bila kukwama. Dili hili linaonyesha jinsi Elon alivyogeuka kuwa "baba wa miundombinu ya AI" duniani.
Bofya hapa umuone colossus
Mtazamo wa 246 Online
Elon Musk amethibitisha kuwa ukiwa na pesa, ukiondoa urasimu, na ukiwa na wahandisi wanaofanya kazi usiku na mchana, unaweza kupiga dhihaka makadirio yote ya wataalamu wa kawaida. Colossus sasa hivi inasimama kama mnyama mkubwa zaidi wa AI duniani, na mbio hizi ndio kwanza zimepamba moto.
Je, unaona spidi hii ya Elon Musk itamfanya aipite OpenAI na Google kwenye soko la AI? Tuambie kwenye comments hapo chini!