Orodha ya Ngoma Zilizovuna Mabilioni ya Tsh Kupitia "Ringtones" Kabla ya Enzi za TikTok na Spotify

Mambo vipi wadau wa 246 Online! Leo tunasafiri kwa mashine ya muda hadi katikati ya miaka ya 2000 (2004–2009). Kabla ya kuwepo kwa TikTok, WhatsApp, au mitandao ya kusikiliza muziki kama Spotify na Audiomack, kulikuwa na biashara moja kubwa sana ya kibabe: Milio ya Simu (Ringtones/Mastertones).

Hapa Gen Z tukae kando kidogo! Hili ni deal la kizazi cha Millennials—wale ambao walikuwa radhi kulipia elfu mbili au tatu kwa wiki ili tu simu zao zikiita mbele ya watu, iimbe ngoma ya msanii anayemkubali.

Timu ya 246 Online imeingia chimbo na kufanya uchambuzi wa data za mauzo ya tasnia ya muziki duniani (RIAA & SoundScan). Tumekuletea orodha ya ngoma zilizovunja rekodi.. Hip-Hop, Pop, R&B, na kile kiumbe cha ajabu cha kijani! Unakijua??

1. "Lollipop" – Lil Wayne (Hip-Hop)

• Mauzo ya Ringtone: Nakala Milioni 5+

• Mvuno kwa Tsh: Zaidi ya Bilioni 13.7

Hii ndio ngoma inayoshikilia taji la kuwa moja ya miito mikubwa zaidi kuwahi kutokea kwenye historia ya simu za mkononi. Wimbo huu uliotoka mwaka 2008 ukiwa na sauti ya Auto-Tune uliwazuzua vijana wengi na kuifanya RIAA kuipa cheti cha 5x Multi-Platinum kwa ringtones pekee.

2. "Crank That (Soulja Boy)" – Soulja Boy (Hip-Hop)

• Mauzo ya Ringtone: Nakala Milioni 5+

• Mvuno kwa Tsh: Zaidi ya Bilioni 13.7

Usiangalie ule upande wa pili wa utani wa Soulja Boy wa sasa hivi. Mwaka 2007, huyu jamaa alitetemesha dunia. Kupitia style yake ya kucheza na ule mlio wa chuma wa "Crank That", Soulja Boy alikuwa msanii wa kwanza kabisa duniani kufikisha mauzo ya ringtone zaidi ya milioni 3, na baadae kuvuka milioni 5, akivuna mabilioni ya Tsh.

3. "My Humps" – The Black Eyed Peas (Pop/Dance)

• Mauzo ya Ringtone: Nakala Milioni 2.5+

• Mvuno kwa Tsh: Zaidi ya Bilioni 6.8

Tukitoka kwenye Hip-Hop na kuingia kwenye Pop, kundi la The Black Eyed Peas lilitengeneza dhoruba kubwa na wimbo wa "My Humps". Mdundo wake mzito wa bass ulikuwa unalia vizuri sana kwenye simu za "Slide" za enzi hizo (kama Samsung na Nokia N-Series), jambo lililofanya kila kijana anayejua kwenda na wakati kuuweka kama ringtone yake.

4. "Smack That" & "Lonely" – Akon (R&B/Pop)

• Mauzo ya Ringtone: Rekodi ya Dunia ya Guinness

• Mvuno kwa Tsh: Mabilioni yasiyohesabika

Hapa ndipo siri kubwa ilipo! Kitabu cha Rekodi cha Dunia cha Guinness Book of World Records kinamtambua Akon kama msanii nambari moja aliyepiga mauzo makubwa zaidi ya milio ya simu (Mastertones) duniani kote. Ngoma zake kama "Smack That" na "Lonely" zilikuwa wimbo wa taifa kuanzia Marekani hadi mitaa ya Dar es Salaam. Simu tatu kati ya tano zilizokuwa zikiita mtaani, zilikuwa na sauti ya Akon.

5. "Let Me Love You" – Mario (R&B)

• Mauzo ya Ringtone: Nakala Milioni 1.6+

• Mvuno kwa Tsh: Zaidi ya Bilioni 4.3

Kwenye upande wa R&B ya kulainisha mioyo, Mario (akisaidiwa na uandishi wa Ne-Yo na mdundo wa Scott Storch) alitengeneza ringtone ya taifa ya wapendanao. Kama ulikuwa unampigia simu mpenzi wako enzi hizo, uwezekano mkubwa ulikuwa unakaribishwa na sauti hii laini.

6. "Gold Digger" – Kanye West ft. Jamie Foxx (Hip-Hop/Soul)

• Mauzo ya Ringtone: Nakala Milioni 3+

• Mvuno kwa Tsh: Zaidi ya Bilioni 8.2

Kanye West naye hakubaki nyuma. Mdundo wa ngoma hii uliochanganywa na sauti ya Jamie Foxx (akimuiga Ray Charles) ulikuwa unaleta mzuka wa ajabu simu ikianza kuita mfukoni.

Bonus ya Kushangaza: "Crazy Frog" – Axel F (Mlio wa Kikaragosi)

• Mauzo ya Ringtone: Zaidi ya Nakala Milioni 11 Duniani kote!

• Mvuno kwa Tsh: Zaidi ya Bilioni 30!
  
  

  

Huwezi kuongelea historia ya ringtones bila kumtaja kiumbe huyu wa kijani (Crazy Frog). Hii haikuwa ngoma ya msanii, bali ilikuwa ni sauti tu ya kikaragosi iliyotengenezwa nchini Sweden. Ilisumbua sana Ulaya na duniani kote kiasi cha kushika namba moja kwenye chati za muziki na kuingiza mabilioni ya pesa kwa kampuni ya Jamba!

Mtazamo wa 246 Online

Biashara hii ilikufa kifo cha asili pale simu janja (Smartphones) zilipoingia na watu kuanza kuweka nyimbo nzima bure au kutumia mitandao ya kijamii. Lakini hadi leo, ukisikia milio hii, kumbukumbu za utotoni au ujana wa zamani zinarudi kwa kasi.

Je, wewe utakumbuka ringtone gani uliyowahi kuitumia kwenye simu yako ya zamani? Tuachie comment yako hapa chini!